Стары Ольса - Drygula

8-ы альбом гурта «Стары Ольса», выдадзены на пачатку лютага 2009 году пры падтрымцы Згуртаваньня беларусаў сьвету «Бацькаўшчына». Зьмяшчаў 13 танцавальных мэлёдыяў ад позняга Сярэднявечча да раньняга барока. 7 танцаў узялі з нотнага зборніку барочнай музыкі «Полацкі сшытак», які называюць таксама «Астрамечаўскім рукапісам» або «Рукапісам 127/56 Ягелонскай бібліятэкі». 6 іншых танцаў былі камэрнымі творамі кампазытараў-лютністаў Валянціна Бакфарка(en) і Адрыяна ле Роя(en), таксама творамі заходнеэўрапейскага і вугорскага паходжаньня. Канцэртная прэзэнтацыя альбома прайшла 14 лютага ў вялікай канцэртнай залі «Менск».
Пры выкананьні твораў выкарыстоўваліся адпаведныя свайму часу, рэканструяваныя беларускімі майстрамі інструмэнты. Дзеля чутнасьці ўсіх інструмэнтаў альбом давялося перазапісаць двойчы. Цыстра, нямецкая дуда і тромба марына (правобраз кантрабаса) запісваліся ў Беларусі ўпершыню.
Вокладка кружэлкі зьмяшчала выявы з касьцёльнай фрэскі ХVII стагодзьдзя «Пляскі сьмерці», што захоўваецца ў музэі Кляштара брыгітак у Горадні.